<髮型屋>
我估, 我小時候是少數不怕到髮型屋的小朋友. 因為, 當年我以為發現一個驚天大秘密 :
頭髮剪左係會長番.
所以, 咪由得你剪. 髮型師叔叔問我想點剪 (其實野野都係剷光), 我答求其或者是但. 所以, 每逢見到老姐每次剪頭髮阿媽都要使出九牛二虎之力, 又藤條又盛, 我都唔明老姐做乜春. 頭髮剪左會長番嘛…. 咪由得阿媽佢用大湯碗笠住個頭剪 – 我四歲前都係用呢個方法剪頭髮….
記得八歲時, 荃灣舊居街口 (大河道附近) 街坊髮型屋, 小童剪髮優惠價是 $33, 成人大概是 $70-$80 – 今天普普通通剪個髮不過是 $150 (小弟去開既更係 $100 有找), 價格漲得算少. 一次係個間野剪完髮, 去而來熊貓酒店附近間美心大酒樓飲茶, 仲叫左碗豆腐花食 – 呢d 大點兼無謂野好少有得食, 估計係由於我乖乖地肯去剪髮 – 點知… 一路食, d 頭髮碎一路跌落碗豆腐花度… 最後搞到成碗野都係頭髮, 食少成半碗. 我承認, 到今天我仍為那吃不到的半碗豆腐花, 深深不忿.
可能由於當年既 “開心大發現”, 我廿幾歲仔試過好多唔同既髮型. 除左而家呢個短髮外 – 短髮只係想減少由起身到出門口返工既時間 – 我小學仲試過卷髮, 係額頭有個波浪; 嘗試留杜拉格斯/ 郭富城頭; 中學時既九一同埋三七分界. 最經典既係當年為左應付高考 (其實係懶), 中七下學期開始無剪髮, 一路留, 足足留左年幾 – 我之前係 skin head – 到左大一下學期, 終於留到好似蘇永康咁長, 但其實更似乞兒.
我當然以為好撚型好盛, 於是乎我本 BNO, 就有一張完全唔似 (而家個個) 本人既相片出現. 加上為左一早返學前搞定, 影相個陣係晨早八點半, 口腫面腫, 影個張相簡直似俾人打左成晚…於是乎拎個本 BNO 去第二次日本, 同埋後來去台灣, 我過海關既時間都極長, 到我過關時更曾有入境職員露出恥笑般既面容… 而隨後既日子, 我每逢唔開心, 或者要令女友開心, 我都會拎本 BNO 出黎睇一睇.
自從蘇永康出現於 BNO 事件後, 我都無再留長頭髮, 一直保留極短既髮型. 去髮型屋, 由坐底到行出門口, 最多四十五分鐘. 由於剪既時間短, 所以我好怕等. 去開既街坊髮型屋無得預約 (屌, Espirit 咩? 成四舊水剪個頭髮), 每次想去之前都要打俾大師傅問下乜野行情. 剪開四十五分鐘, 我更怕花幾個鐘頭整個髮型 – 聽退休 J 同女友人講, 佢地電個髮閒閒地要由十二點坐到六點, 嘩… 真係屎忽開花. 連飯都要係髮型屋叫外賣食.. 我聽落去真係匪夷所思, 該煨, 剪個髮使唔使咁呀? 六個鍾夠我剪 8 次頭髮咧… 真係要推左 n 咁多個約會先可以剪一次頭髮.
後來, 可能家姐都知道 “頭髮剪左會長番” 呢個開心大發現, 佢青春期開始就成日去髮型屋 – 半個月, 一個星期 – $150, $300, $500, $1000 佢都剪過. 但每次佢剪完, 阿媽既反應都祇係得一個 :
下? 咁叫做剪左嫁咧?
當然, 家姐會花好多唇舌解釋… 呢度短左半寸, 呢度無左三條, 前面修左少少, 後面長左少少….
(又, 而家已經好少髮型屋門口有呢個燈 (佢學名叫乜?))
